مايهمنيش فيه الكتاب لسود و إلاّ لحمر و إلاّ
لخراوي متاع زوكي، إلّي طلّعلي الزّبل لـ راسي كي قريت اسم توفيق بن بريك، آش مجبّدك في مرتي ڤال ولد الحو. آش مجبدك فيه توفيق. عاملّو 5 صفحات و تحكي ع الظلم إلي تسلّط عليه. ڤلّك احكي عليّا هو؟ حاطّو في ليستة "الاعلام و المعارضه". ليسته؟ علاش ياخي كان فمّا واحد آخر بخلافو حاربها الآله، راس براس؟ فمّا غيرو كتب في أكا العهد؟ فمّا غيرو درّع الخواطر و جابها عاري و لابس و ڤلب الدنيا؟ تكتلت عليه المخابرات الفرنسويه و التونسيه و لفقولو القضايا و سكروا عليه في الحبوسات، و مانجموهش. رونده بـ رونده و ديما ولد الامبراطوره يخرج غالب. آش مجبدك في توفيق؟ لا يزّي ما تكتب شي، جمل ساقطه، جمل ضعيفه، مش محسوبه. كـ ما تفهمش في الهندسه لواش تكتب؟ زيد ردّيتو مراسل "La croix" إلّي كتب فيها زوز مقالات يتيمـه. تي عمرو ماكان مراسل لـ حتى جريده ولاّ تلفزه. و مع هذا كتب فيهم الكل. ما تفكرتش مـ الاعتدءات كان اللي صار على جلال خوه؟ وينو اضراب الجوع اللي عملتو العيله الكل؟ وينو علي ولدو إلي شدّوه و رعبوه، يحبّو يهزّوه يعدّي الجيش و هو عمرو 14 عام. ويني حكايات خديجه بنتو الصغيره مع البولسيه إلي يتبعو فيها ملّي هي في الروضه. ويني عزّه مرتو إلّي حفت، بين طيارات و جرايد و تلافز و حبوسات. ويني دموع نجاة أختو و جلال إلي مازال لتوّ مفسّخ من ليستة المحامين. وينو و وينو و ويني؟ ويني حملات المسانده و الحفلات إلّي على شرف بن بريك؟ ويني الرساله إلّي خرجت مـ الحبس وينو نصّ نعلي؟ وينو اضراب الجوع و حبس سليانه؟ ويني المقالات الي تنشرت في كل جرايد العالم: Charlie Hebdo, Le Nouvel Observateur, Le Figaro, The New York Times, Libération, L'Humanité, Les Inrockuptibles, Marianne, Courrier international, Les Clés de l'actualité, L'Audace, Le vrai journal papier, Le Matin, Demain, Le Journal, Al Ahram, L'orient expresse, La Tribune (...) وينو و وينو و وينو؟ تي ماك تعرفهم الحكايات الكل. خفت تبدى تكتب يولّي الكتاب الكل يحكي على بن بريك؟ ويني الكتب إلّي تنشرت في اكبر دور نشر في العالم؟ وينو الشعر إلّي كان يوقّف كليّة الحقوق على رجل؟ وينو الكلام الي لازم يتقال على "مارادونا الصحافة" الي في الاحصائيات في 2009 جاء قبل اوباما و مايكل جاكسون. إلّي اشهر الصحافه العالميه ما تكتب كان عليه؟ آش مجبدك في توفيق؟ هزّ على قد مغرفتك؟ آش مجبدك في "بْرا كاسي"؟ تتفكّر كـ كتبت زوز نصوص لقيطه و تستنّى في توفيق يقوم من القايلـه متاعو باش يتوسطلك و تنشرهم؟ قدّاش من ساعه تعدّيها تستنّاه يفيق من القايلـه المقدسه متاعو، باش يقولو عليك جملـه في جريده فرنسويه؟ نسيت إلّي كتبو عليه 40000 مقال نهارت إلّي خرج من الحبس؟ الشيلي، الصين، الأرجنتين، فرنسا، ألمانيا، بلجيكيا، إنڤلترا، الپيرو، النمسا، السويد، جنوب إفريقيا، لبنان، الجزائر (...)؟ زو.كي برّا ألعب قدّام داركم مع نصر الدين بن حديد و صالح الحاجه و كي تحب تحكي على بن بريك تفكّر إلّي هو "رّْوَا" "الپروپاڤندا" الإعلامية، بدون منازع